PODCAST

San Valentín no instituto. Xa pasou San Valentín e, con el, as rosas de plástico e os dramas de corredor. Un episodio, nas voces de Ana e Ainhoa, para escépticos e románticos de manual.

O son do universo. A que sona o baleiro? Da man de Unai e Aarón afastámonos do ruido diario para explorar as frecuencias e as ondas de radio que viaxan polo universo

CONCURSO "DALLE RITMO A ROSALÍA"

A poesía de Rosalía de Castro non entende de tempos nin de formatos, e os nosos alumnos e alumnas encargáronse de demostralo neste concurso. O resultado? Espectacular. Tras unha dificil deliberación o xurado destacou os traballos de: 

1º Premio: Ander e Gabriel (2º ESO)

2º Premio ex aequo Lorea e Noa (3ª ESO), Marcos, Alba e Melissa (2º ESO). 

Podedes ver os seus traballos neste vídeo

8 DE MARZO

Este 8 de marzo, Día Internacional da Muller, recordamos con Begoña Caamaño que a historia non é un relato pechado, senón unha tea que podemos volver tecer. A través de obras como "Circe ou o pracer do azul"  e "Morgana en Esmelle", Caamaño non só rescatou personaxes femininos silenciados pola mitoloxía clásica e a materia de Bretaña; devolveulles a súa soberanía, os seus desexos e, sobre todo, a súa capacidade de decidir.

ROSALÍA DE CASTRO

 Ampliamos o prazo de entrega ata o 3 de marzo!!!!

ENTROIDO 2026

Para ver as estrelas non hai que agardar á noite. Baixo o lema "O noso Universo" o 13 de febreiro o IES de Mugardos transformouse unha nave cargada de creatividade, ritmo e calidade dirixida polo alumnado de Oratoria (Diana, Daniela, Ainhoa, Ana, Aarón, Eneko, Unai e David). No vídeo temos unha pequena mostra da imaxinación e saber facer de profes e alumnos-as.

30 DE XANEIRO

 Este 30 de xaneiro é o día dunha dobre celebración: o Día da Ilustración en Galicia  e o Día da Paz. Por unha banda poñemos en valor a importancia do debuxo e o deseño na nosa cultura  cun vídeo sobre a vida e obra de Siro López (artista homenaxeado este ano pola súa mestría na caricatura e o humor gráfico); doutra banda algúns dos nosos alumnos interpretan o canon de Mozart "Dona nobis pacem" (Dános a paz), peza clásica cuxa polifonía nos lembra que a paz se constrúe sumando voces.

TES TALENTO

 

Miúdo talento hai neste centro! Así vivimos (da man de Aarón, Ana, David, Daniela, Eneko, Diana, Unai e Ainhoa) o noso festival e concurso deste ano. Houbo moitos nervios, moitas risas e, sobre todo, temazos que nos fixeron vibrar a todos e todas. Non te perdas as actuacións máis épicas deste Nadal. Acompañádenos a revivir as actuacións e a descubrir quen levou os premios a:

- Mellor actuación musical (o listón estivo máis alto que nunca)

- Mellor xersei feo - Ugly Sweater (a competición máis divertida e colorida)

- Mellor porta decorada (creatividade en estado puro para recibir o nadal)